Улсын Их Хурлаас 2023 онд Төрийн албан хаагчийн ёс зүйн тухай хуулийг баталсан. Тус хуулийг хэрэгжүүлэх хүрээнд суманд үйл ажиллагаа явуулдаг төрийн байгууллагууд Ёс зүйн дэд хороог 3-5 хүний бүрэлдэхүүнтэй байгуулан ажиллаж байна. 

Сумын ИТХ-ын ажлын алба, ГХУССЗ-өөс Ёс зүйн дэд хороодын бүрэлдэхүүний мэдлэг, чадварыг дээшлүүлэх, үйл ажиллагаатай нь танилцаж, харилцан туршлага солилцох зорилгоор сургалт, арга хэмжээг Хурлын даргын баталсан хөтөлбөрийн дагуу зохион байгуулав. 

-Арга хэмжээний үеэр Ёс зүйн дэд хороодын дарга нар ИТХ-ын Хууль,  эрх зүй, хяналт шалгалт, өргөдөл, гомдлын хороо болон оролцогчдод  ажлынхаа танилцуулгыг хийж, харилцан туршлага солилцов. 

-Мөн ИТХ-ын нарийн бичгийн дарга Д. Мөнхнаран Төрийн албан хаагчийн ёс зүйн тухай хууль болон хуулийг хэрэгжүүлэх хүрээнд батлагдсан шийдвэр, журмуудын талаар сургалт мэдээлэл хийв.

-Ёс зүйн дэд хороодын бүрэлдэхүүний дунд Төрийн албан хаагчийн ёс зүйн тухай хуулийн талаар мэдлэг сорих тэмцээн зохион байгуулахад Эрүүл мэндийн төвийг Ёс зүйн дэд хорооны дарга Ж. Шинэцэцэг тэргүүн байр, ЗДТГ-ын Ёс зүйн дэд хорооны дарга Ж. Базарсад дэд байр эзэлж бусдыгаа манлайлав. 

Арга хэмжээний үеэр Ёс зүйн дэд хороо бол хянадаг шалгадаг гэхээс илүү байгууллагын нэр хүнд соёлыг төлөвшүүлэхэд зөвлөдөг, тусалдаг, соён гэгээрүүлдэг бүтэц байх ёстойг онцлов.